Daan tungo rito’y hindi patag, maputik, kung tag-ula’y nagiging ilog pa. Kailangan pang sumakay ng mga 4x4 na sasakyan at magtrek upang marating ang lugar. Kung hindi siguro ito nagdulot ng kapinsalaan noo’y wala itong natatanging ganda ngayon.

​

Isa sa mga pinakakilalang bulkan sa buong Pilipinas ang Bulkang Pinatubo, na nasa gitna ng mga rehiyon ng Tarlac, Pampanga, at Zambales. Ito’y sumikat dahil sa pinsalang naidulot nito noong Hunyo 15, 1991. Ang pagsabog nito ang panagalawa sa pinakamalakas at mapaminsalang pagsabog ng ika-dalawampung siglo. Ito’y pumangalawa sa Bulkang Novarupta ng Alaska. Lalo pang nakadagdag sa danyos nito ay ang Bagyong Diding, ang paghahalo ng abo at tubig ulan ay nagdulot ng kapahamakan sa mga katutubong Aeta na naninirahan doon pati sa mga karatig bayan at lungsod.

​

Sa kasalukuyan ito’y naging puntahan ng mga tourista,  mapa-Pilipino man o dayuhan, mga taong naghahanap ng kakaibang karanasan sa paglalakbay. Kung saan ang paligid ng lugar ay nagsisilbing tirahan ng iilan sa ating mga kapatid na Aeta. Isa sila sa mga patuloy na nangangalaga sa kagandahan at kalinisan sa paligid ng bulkan.

​

Halos lahat siguro ng mga Pilipino alam ang tungkol sa lugar na ito, pati na rin ang kwento sa likod nito. Dahil doon at sa angkin nitong ganda, ito’y naisama sa pelikulang Crazy, Beautiful You na pinagbibidahan ng mga artistang sina Daniel Padilla at Kathryn Bernardo. Ito’y isa sa mga dahilan ng pagpatok nito sa mga tao at lalong lumago ang turismo ng bayan ng Capas.

​

Bawat tao sa mundong ating ginagalawan ay may mga naranasan sa nakaraan na ayaw na nating maulit muli. Mga karanasang nanakit at nagpahirap sa atin. Ngunit kung ating iisiping mabuti, ang mga pangyayaring ito ang mga humubog sa kung sino tayo ngayon. Ganito rin ang kwento sa likod ng Mt. Pinatubo at sa trek nito sa Bayan ng Capas. Ang pinsalang dinulot nito noon, ay gandang walang kapantay ngayon.